Економијата се стабилизира, а растот од над 3% во првите три месеци е само почеток. Дел од аналитичарите очекуваат уште подобри перформанси на економијата до крајот на годинава. Универзитетскиот професор Синиша Наумоски е оптимист дека и покрај ризиците однадвор, во втората половина од 2025-та, растот ќе се темели главно на градежништвото, сектор кој во првиот квартал се зголеми најмногу, односно за 7,1%. Тој смета дека во овој период ќе се видат ефектите од склучените или најавени договори, пред се стратешкото партнерство со Обединетото Кралство, инфраструктурните проекти на општините, веќе започнатата изградба на патишта, инвестициите на бизнисот со пари од унгарскиот заем.
Најголем раст во структурата на БДП имаат бруто инвестициите од 18%. И покрај тоа што извозот се зголемил за само 1,2%, ова е прв квартал во позитива, откако лани извозот беше во минус. Според Наумоски, овие бројки се резултат на послабиот извозен потенцијал на компаниите од индустриските зони поради кризата во германскиот автомобилски сектор. Најавите, пак, дека Македонија ќе ги сведе на нула царините кон САД и очекува да склучи Договор за слободна трговија, како и намалувањето на 67 царински стапки, ќе значи пониски трошоци за суровини и поголема извозна конкурентност.
Наумоски вели дека за граѓаните да ги почувствуваат придобивките од економскиот развој, растот на Македонија треба да изнесува најмалку 5% на среден рок. Она на што треба да се обрне внимание, според него, се ризиците дали македонските компании имаат доволно капацитети да ги сработат договорените проекти. Затоа требало повеќе да се вложува во поттикнување на претприемништвото за младите да отвораат нови бизниси, како и поактивно дуално образование за да има доволно кадар за реализација на инфраструктурните проекти. Бизнисот веќе побара македонските компании да бидат вклучени со барем 70% во изведбата на инфраструктурните проекти.
