Нема потреба од загриженост. Гас ќе има, без разлика од каде ќе се набави. Министерката за енергетика Сања Божиновска смирува откако Европската Унија одлучи да го забрани увозот на руски гас во ЕУ од 1-ви јануари. Оваа одлука го вклучува и транзитот на таа енергија низ ЕУ до трети земји. Регулативата за ставање крај на зависноста од руската енергија со целосна забрана ќе стапи на сила од јануари 2028 година. Притоа, ќе продолжат да важат постоечките краткорочни договори склучени пред 17 јуни годинава кои ќе се спроведуваат до јуни догодина, а долгорочните договори до 1 јануари 2028 година. Министерката за енергетика Сања Божиновска вели дека Македонија нема да претрпи многу бидејќи нема голема потрошувачка. Дополнително изградбата на интерконекторот со Грција треба да придонесе Македонија да се снабдува со количини гас од друго потекло.
„Македонија троши 500 илјади метри кубни што не е голема количина. За од 2027 година веќе работиме на гасоводот со Грција, дотогаш би требало да биде готов и мислам дека нема да има проблем бидејќи тоа ќе се решава на европско ниво, значи на ниво на ЕУ сите тие што нема да можат и ќе треба да бараат алтернативи. Во Брисел ќе има разговори и ќе се пронајде алтернативно решение секако“ – рече Божиновска.
Европската Унија не само што им наложува на државите да ги раскинат договорите кои важат по 2028-мата година, туку предвидува и дополнителен мониторинг за да се спречи влез на руски гас во ЕУ. Србија веќе негодува дека државата се наоѓа во незавидна ситуација по ваквата одлука. Тамошната министерка за енергетика Дубравка Ѓедовиќ Хандановиќ соопшти дека Србија е во многу тешка и речиси безнадежна ситуација. Таа рече дека Бугарија нема да дозволи проток на руски гас преку гасоводот Балкански тек, што значително ќе ѝ наштети на Србија. Државата е зависна од увоз на гас од Русија, од каде што задоволува повеќе од 80 проценти од своите енергетски потреби. Во последните 4 години од стартот на руската инвазија на Украина, Европската унија речиси целосно ја прекина својата зависност од руските енергетски извори. Беше забранет увозот на руска нафта, јаглен и поголем дел од гасот.
