Македонија ги укинува царините за САД – ваква одлука донесе Владата на последната седница. Со измените на Законот за царинска тарифа, целосно се ослободува увозот на сите производи кои македонските компании ги увезуваат од САД. Надлежните велат дека на овој начин, праќаат порака за репроцитет, односно дека очекуваат дека администрацијата на американскиот претседател Доналд Трамп во најскоро време да ги укине царините за увоз на македонски производи. Премиерот Мицкоски рече дека очекува Македонија да биде меѓу првите земји во светот којашто ќе добие договор за слободна трговија со САД. Тој е задоволен од средбата што министерот за надворешни работи и надворешна трговија Тимчо Муцунски ја оствари со државниот секретар на САД Марко Рубио. Муцунски бил еден од само 7 министри за надворешни работи од Европа кои биле примени од страна на Марко Рубио.
Со измените на Законот за царинска тарифа, од 1-ви јули треба да се намалат и царините, и тоа за 50% на разликата помеѓу нашите царински стапки и тие во Европската унија. Се работи за стоки, суровини и репроматеријали коишто се користат во индустријата, поточно во автомобилскиот и металопреработувачкиот сектор, металургијата и енергетиката. Со нивното поевтинување, надлежните очекуваат овие материјали потребни за производство на високофинални производи, да ја зголеми извозната конкурентност на домашното стопанство. Исто така, од 1-ви јули треба конечно да се намали и царината за литиум-јонските батерии од 15% на 2,7%, со што полесно ќе се складира енергија, а со тоа се помага на енергетскиот сектор.
Министерката за финансии Гордана Димитриеска Кочоска рече дека од денеска Владата започнува да работи на ребаланс на државниот буџет. Во следните две недели ќе има интензивни консултации со владините министри околу нивните буџети и планови, по што ќе се знаат новите параметри на државната каса. Ребалансот на буџетот треба да се изгласа во Собранието пред распишувањето на локалните избори.
