Се мери статиката на сите мостови кои се наоѓаат на реките Брегалница и Отиња во Штип. Стручни екипи од ИЗИС вршат детални испитувања на конструкциите, со цел да се утврди нивната стабилност и носивост. Мерењата треба да бидат готови кон крајот на месецот, по што врз основа на овие резултати ќе бидат донесени понатамошни одлуки и евентуални мерки, доколку се утврди одредена нестабилност во конструкциите.
„На територијата на Штип имаме мостови кои се изградени пред педесет години и е потребно соодветно испитување… Имаме веќе склучено јавна набавка со ИЗИС за испитување на статиката на овие мостови и врз основа на овие испитувања ќе бидат преземени сите основни чекори кои како локалн самоуправа имаме одговорност да ги преземеме„ изјави Иван Јорданов, градоначалник на Штип
Јорданов, потенцира дека постапката е превентивна и нема простор за паника меѓу граѓаните. Во фокус на експертите се мостовите на река Брегалница, поради променливиот водостој кој со години влијае врз нивната стабилност.
„Водостојот на река Брегалница, се менува и сето тоа влијае на статиката на овие мостови. Јас верувам дека по анализите и истражувањата ќе бидат преземени сите мерки. Тоа не значи дека треба да владее паника меѓу населението. Ова го правиме превентивно како една одговорна локална власт . овде пред се мислам за мостовите на река Брегалница каде има поголема носивост. Доколку се констатира одредени проблеми или опасност, ќе бидат преземени соодветни мерки, односно измена на сообраќаен режим во однос на статиката на мостовите„ изјави Иван Јорданов, градоначалник на Штип.
Откако ќе завршат испитувањата, од Општината најавуваат интервенции и за подобрување на изгледот на мостовите. Предвидено е поставување на современо осветлување кое ќе ја зголеми безбедноста за граѓаните и ќе им даде поатрактивен и современ визуелен изглед на мостовите.
