Скандал во штипската болница. Во операциона сала се степале двајца лекари. Ортопед и хирург прво почнале да се расправаат и меѓусебно да си дофрлуваат, па физички се пресметале. Која била причината за расправијата, дали кавгата настанала поради пацент – засега не се откриваат детали, но, неофицијално лекарите оперирале двајца различни пациенти.
Случајот го потврди менаџментот на болницата, од каде информираа дека веќе е поведена дисциплинска постапка за двајцата вработени. Во соопштението испратенпо од болницата, само се посочува дека бил нарушен работниот ред со физичка пресметка.
„Во текот на вчерашниот ден 05.02.2025 година околу 12:30 часот во работните просториите на Клиничка болница – Штип дојде до нарушување на работниот ред со физичка пресметка помеѓу двајца вработени. Во текот на денешниот ден, од страна на надлежните од болницата случајот е пријавен во СВР-Штип и е поведена дисциплинска постапка за двајцата вработени“се вели во соопштението од Клиничка болница – Штип.
Од таму велат дека за сите понатамошни постапувања јавноста дополнително ќе биде известена. Претходно од полицијата известија:
„На 5 февруари во 12:45 часот во СВР Штип, Н.Т. од Штип пријавил дека на работното место во операциона сала во Клиничка болница – Штип бил физички нападнат од неговиот колега З.Ш., на што возвратил “ се вели во соопштението од СВР-Штип.
Се работи на расчистување на случајот, по што ќе биде поднесена соодветна пријава.
