Сите дојави за бомби во училиштата се лажни. Безбедносната состојба во училиштата е стабилна и нема потреба од паника, порача директорот на Бирото за јавна безбедност, Александар Јанев, откако утринава пристигнале над 240 дојави за поставени бомби во училишта ширум државата. Јанев, посочи дека имат одредени траги и веќе се во контакт со колегите од Интерпол и Европол.
„Училиштата од денеска ќе добијат јасни инструкции што понатаму ќе се прави во иднина доколку се повторат ваквите настани. Директорите постапија согласно протоколите. Македонската полиција и сите агенции за спроведуваање на законот покажаа јасна и одлучна борба против сите видови на криминал. Немаме дојава за криминал, каде што не сме одговориле или постапиле. Фокусот е да ги обезбедиме граѓаните од безбедносен аспект, но и од криминалот“ изјави Александар Јанев, директор на БЈБ
Доколку училиштата повторно добијат дојава за бомба треба веднаш да пријават во МВР и да ги следат упатствата и протоколите кои ќе ги добијат од стручните лица, порача министерката за образование. Таа апелира, за комуникација единствено да се користат службените мејлови, бидејќи безбедноста е подигната со двојна автентикација.
„Општините под чија надлежност се училиштата препорачуваме секаде во согласно можностите да биде ангажирано физичко обезбедување и да се постави видео надзор. Самите училишта да бидат претпазливи кој и како влегува во објектите“ изјави министерката за образование, Весна Јаневска
Ваквите хибридни напади не се неочекувани и за нив ќе треба да се подготвиме, порача и премиерот Христијан Мицкоски, откако утринава до училиштата ширум државата беа испратени дојави за поставени бомби. Премиерот посочи дека работна група веќе работи на изготвување на протокол кој во најбрзо време ќе биде доставен до училиштата, директорите и МВР.
„Сите без исклучок се лажни дојави. Тие се тие напади хибридни напади коишто ќе се случуваат, не е нешто неочекувано, ќе треба да се подготвиме. Постапено е според протоколот, ваков тип на напади имаше пред некој ден и во Хрватска, претходно и во институциите во Унгарија и претпоставувам дека ова ќе биде континуитет кај нас, но мислам дека се креира еден протокол“ изјави премиерот Христијан Мицкоски.
Утринава на електронските адреси на училиштата ширум државата стигна дојава за поставени експлозивни направи. Учениците и вработените беа евакуирани, а откако полицијата потврди дека станува збор за лажни дојави, учениците се вратија во училишните клупи.
