Кривичниот суд во Скопје уште се нема изјаснето по обвинението за останатите обвинети во случајот Кочани поради обемноста на материјалот.
Станува збор за обвинение напишано на повеќе од 160 страници, со над 1.000 докази и околу 300 сведоци, и со огромен број доказен материјал.
Неофицијално, дури 39 адвокати на 34-те обвинети поднеле приговори, но судот се уште чека да помине и рокот од 8 дена, за случајно некој од нив да не испратил приговор и по пошта.
Советот кој ќе работи на оцена на обвинението е формиран од тројца судии, од кои двајца работат во одделот за организиран криминал — и тоа Илија Трпков и Софче Гаврилова, додека претседател на советот е судијката Моника Бахчовановска.
Сепак, од судот велат дека оваа постапка ќе биде долга поради тоа што се работи за обемен предмет. Го споредуваат со оценката на обвинението за предметите познати како „Синџир“ и „Адитив“, на кои се чекаше по околу 4 месеци.
Обвинението е поднесено на 13 јуни, а во него се обвинети 34 луѓе и три фирми.
Како што веќе објави Алфа, судењето за овој случај може да трае со години, ако не и цела деценија поради обемноста на материјалот.
