Бизнисот е согласен минималната плата да биде и 500 евра, но поголемиот трошок да се компензира со пониски придонеси. Од Стопанската комора на северозападна Македонија велат дека ако се намалат придонесите од 47,7 на 32%, ќе можат да ги покачат и платите на работниците. Од комората повторно побараа дел од администрацијата да се прераспредели во приватниот сектор, бидејќи соодветен кадар има се помалку и помалку. Допрва треба да разговараат и да ги определат пакетите со кои ќе се стимулираат службениците да го променат работното место.
Бизнисот бара реализација на најмалку 80% од предвидените капитални инвестиции догодина кои се проектирани на рекордно највисоко ниво 820 милиони евра. Сметаат дека сите фирми кои исполнуваат услови, без исклучок на дејноста, треба да бидат финансирани од банките преку унгарскиот заем, бараат рамноправна распределба на странските инвестиции во сите индустриски зони, поголема децентрализација на општините.
Голем број на фирми чекаат поврат на ДДВ подолг период. Од комората на северозападна Македонија велат дека претходната Влада доцнела со повратот на ДДВ. Сега состојбата почнала да се подобрува, дел од данокот почнал полека да се враќа, но треба уште многу за државата да биде подисциплинирана во плаќањата кон бизнисот. Ако се исполнат нивните барања, од комората велат дека е остварлив раст на економијата од околу 4% во наредните неколку години.
