Со повик за сплотеност, истрајност и човечност, градоначалникот на Кочани, Владко Грозданов, најави тридневна програма со која ќе се одбележи една година од трагедијата во дискотеката Пулс. Настаните ќе бидат посветени на загинатите, повредените, но и на сите кои несебично помогнаа по трагедијата. Грозданов, повика на заедништво бидејќи тоа е единствениот начин да се продолжи по една ваква голема трагедија, која ќе остане трајно врежана во меморијата на нацијата.
„Младите што трагично ги загубивме ја заслужуваат нашата почит. Заслужуваат почит која треба да ја изразиме мирно, достоинствено и сплотено…. Нека овие денови не бидат само сеќавање на болката, туку и нов лист во нашето заедничко делување, да станеме општина на сплотеност, истрајност и мир“, рече градоначалникот на Кочани, Владко Грозданов.
Програмата започнува на 14-ти со православни содржини за молитвено сеќавање. Наредниот ден под мототот „Кочани ви благодари„ вниманието ќе биде насочено кон повредените, но и кон сите здравствени работници, институции, здруженија и поединци кои во најтешките моменти покажале голема хуманост и пожртвуваност. Грозданов ги охрабри повредените да ги поканат своите лекари кои им биле потпора во борбата за живот.
„Ве охрабрувам сами да си ги повикате своите лекари, медицински крепители. Општина Кочани е овде и ќе ги удостои со топол и срдечен прием, ќе им обезбеди сместување и сите потребни почести. Планираме сите кои се жртвуваа да ги одликуваме со статуетки на благодарност„ рече на денешната прес конферернција, градоначалникот Грозданов.
На 16-ти кога ќе се одбележи точно една година од трагедијата ќе се одржат содржини посветени на достоинствено оддавање почит на починатите во дискотеката Пулс, каде животот го загубија 63, а над 200беа повредени. Тридневниот настан, ќе биде организиран од заедничкиот организационен одбор составен од Здружението на граѓани-16 Март , Oпштина Кочани и уште неколку институции во Кочани.
