Речиси девет часа во текот на ноќта, Киев беше под силна воздушна опсада. Воздушната тревога продолжи и изутрината, поради заканата од балистички ракети. Русија изврши масовен ракетен напад врз украинскиот главен град, при што беа употребени хиперсонични ракети „Кинжал“, балистички ракети „Искандер“ и крстосувачки ракети „Калибр“.
Според официјалните информации, во нападите се повредени најмалку 11 лица. Поради сериозните оштетувања на енергетската инфраструктура, речиси една третина од Киев остана без греење, а во повеќе делови од градот се забележани прекини во снабдувањето со електрична енергија.
Градоначалникот на Киев, Виталиј Кличко, соопшти дека осум од повредените се хоспитализирани.
Како одговор на нападите, Полска во текот на ноќта ги мобилизираше своите воени авиони. Полските вооружени сили информираа дека борбени летала биле подигнати за заштита на воздушниот простор, поради што привремено беа затворени аеродромите во Жешов и Лублин.
