Од дома го собра полициско комбе, па преку судскиот подрум го донесоа до шалтерот од Кривичен суд. Оттаму го седна на столче во судницата каде го дочекаа осум кутии копии од докази против него. Од прв вицепремиер и човек кој палеше и гасеше во државата, до обвинет во прв ред пред судијата.
Артан Груби конечно седна на обвинителна клупа. Ги слушна правилата и роковникот на судењето што го чека за милионскиот криминал во „Државна Лотарија“. Ќе се појавува минимум по два пато неделно на суд, а додека го чека следното рошиште закажно за 7-ми септември, од дома каде е во куќен притвор, ќе чита обвинение против него и ќе ги разгледува докази за злоупотреба на службената положба и овластувањата што ги направил како екс заменик претседател на Владата. За истото кривично дело се товарат и останатите седум обвинети меѓу кои и екс директорот на Државната лотарија Перпарим Бајрами кој е во бегство. Казната која им се заканува е од една до максимални пет години затвор.
Судијката планира по најмалку две рочишта неделно оти се работи за брза постапка, а обвинителот Даниел Коцев најави дека за четири рочишта би требало да заврши со презентација на 230 докази и испрашувањето на седум сведоци.
Злоупотребите на обвинетите, Коцев ќе ги докажува со вештачење.
- „Материјалните докази, со исклучок на вештиот наод и мислење, би ги извеле на едно рочиште. Во однос на вербалните докази, зависи од вкрстените прашања, но би завршиле за две до три рочишта “, рече обвинителот.
Копии од доказниот материјал подготвен во осум хартиени кутии им беше даден на сите обвинети и адвокатите, вклучително и до бранителот на Бајрами, иако поранешниот директор на Државна лотарија е во бегство.
Груби по 14-месечно бегство се предаде на граничниот премин Блаце на 23 февруари 2026. Беше избеган во Косово, каде за влез не треба пасош туку само лична карта. По поминати само неколку часа во Шутка, скопското обвинителство се премисли па му се ублажи мерката во куќен притвор. Таму може да биде само уште месец и половина, поради тоа што предметот е во брза постапка, а судијката ги закажа следните 13 рочишта. Прво обвинетиот Бајрами, се гони бидејќи како екс директор на Државна лотарија иницирал приредување електронски игри а среќа и набавил ВЛТ терминали. За тоа потпис од Владата му ставил Артан Груби кој раководел со седницата како прв вицепремиер кога се донела таквата одлука, спротивно на законите. Обвинет е и екс ген сек на Владата Методија Димовски.
