Густиот чад кој денеска го покри Скопје доаѓа од активните пожари на планините Китка и Жеден. Ветрот го носи кон главниот град, информираат надлежните. Мирисот на изгорено ги вознемири скопјани, кои ги вжештија телефоните на ЦУК, стравувајќи дека гори Водно. Додека Скопје се бореше со густиот чад, огнот беснееше на повеќе локации низ државата. Најтешка е состојбата на Китка, каде во една од акциите пожарникарите спасиле теленце, заробено од огнените јазици. Критично е и над селото Бојане, на планината Жеден.
„Пожарот од тетовската страна сега се префрли на скопската. Тој е на тешко пристапен терен на планината. Во неговото гаснење учествуваат пожарникари од Тетово, како поддршка на скопските пожарникари. Очекувам тој да биде ставен под контрола“, изјави директорот на ДЗС, Стојанче Ангелов.
Во меѓувреме, локализиран е пожарот во пробиштипското село Гујновци, каде изгореле неколку помошни простории. Големите шумски пожари кои вчера избувнаа во Пехчевско и Делчевско се локализирани, но сè уште се под опсервација на надлежните.
„Според првичните информации, опожарена е борова и дабова шума од 220 хектари, што е значително голема површина. Ова ми дава за право уште еднаш да упатам апел до сите граѓани во државата, бидејќи една ненамерна грешка може да предизвика големи штети и, не дај Боже, загуба на човечки животи“, изјави градоначалникот на Делчево, Иван Гоцевски.
Според информациите од Центарот за управување со кризи, денеска до 13 часот биле регистрирани вкупно 14 пожари на отворен простор. Од нив, пет се активни, еден е под контрола, додека осум се изгаснати.
