Оштетени куќи, покриви, поплавени домови, искршени автомобили. Над стотици пријави за штети од силното невреме кое го зафати Скопје пред еден месец пристигнале до општинските комисии. Во петокот истече рокот за пријавување, а сега се комплетира документацијата, по што се очекува да стартува обезштетувањето. Во општина Аеродром пристигнале 150 пријави.
„Постојат две големи групи на штети, тоа се оштетени возила кои се пријавени до општина Ааеродром како последица од невремето односно паднати дрвја и оштетени кровови на колективни индивидуални домаќинства и тие се двете најголеми групи на штети, постојат штети од протекување, поплавување, но оштетени возила и кровови се најголемите штети“, изјави градоначалникот на Аеродром Дејан Митески.
Се обработуваат пријавите и во Карпош, Центар, Гази Баба. Од Град Скопје најавуваат дека во наредните денови ќе се одржи нов состанок со градоначалниците на скопските општини, на кој ќе се сумираат пријавите и ќе се разговара за понатамошниот тек на постапката.
„Градоначалникот Георгиевски повторно ќе има состанок со градоначалниците на кои ќе се утврдуваат бројот на пријавени штети и согласно законската регулатива и воспоставена пракса ќе се започне постапка за поддршка на граѓаните при санација на оштетувањата на објектите за домување“, велат од Град Скопје.
По завршувањето на работата на комиисиите треба да се утврди вкупниот обем на материјалната штета. Комисиите израбоуваат елаборат за сите барања, кој треба да го достават до Владата, која пак ја презема обврската да им помогне на општините и граѓаните да ги исплати нивните штети.
