Очекувам дека надлежните државни институции, вклучително и Јавното обвинителство, со должно внимание и сериозност ќе ги разгледаат наодите и препораките од Конечниот извештај на Државниот завод за ревизија (ДЗР) и, во рамките на своите законски надлежности, ќе преземат соодветни активности за утврдување на евентуалните одговорности – вели во својтата објава на социјалните мрежи, Дејан Кошутиќ, претседател на УО и генерален директор на ЖРСМ ТРАНСПОРТ.
Тој очекува со тоа да се постигне „институционалната отчетност, владеењето на правото и утврдувањето на одговорноста“ како „неопходни предуслови за враќање на довербата во железничкиот систем“.
„Истовремено, неопходно е да се создадат услови менаџментот на ЖРСМ Транспорт целосно да се посвети на својата примарна задача – стабилизација на работењето, финансиска консолидација, обнова на возниот парк и спроведување на започнатите реформи за модернизација и развој на македонската железница. Минатото бара одговорност. Иднината бара работа, реформи и резултати“, истакнува Кошутиќ.
Неговата рекација доаѓа по Конечниот ревизорски извештај на Државниот завод за ревизија (ДЗР) за работењето на ЖРСМ Транспорт АД Скопје (објавен на 3 ноември 2026 година) кој содржи сериозни наоди за финансиската нестабилност, лошото управување и критичната состојба со возниот парк во текот на 2024 година, а кои наоди всушност се однесуваат на работењето ан претходното раковдство во време на претходната Влада и дел од наследните состојби од тоа работење. Ревизорите изразија неповолно мислење за вистинитоста на финансиските извештаи и за усогласеноста на работењето со законите.
