Над педесет компании и сите факултети при штипскиот Универзитет на кариерен ден ги претставија своите програми пред идните и сегашни студенти. Меѓу нив и средношколката Елена Николова од Струмица, која вели дека ваквите настани им помагаат полесно да го изберат идниот професионален пат.
„Сме заинтересирани да видиме што нуди штипскиот Универзитет во областа на медицината, денталната медицина и сакаме да видиме какви можности имаме овде“, изјави Елена Николова, идна студентка.
Без стручен и добро квалификуван кадар, нема одржлива економија. Поврзувањето на образованието со реалниот сектор е клучно за создавање подготвен и конкурентен кадар на пазарот на труд.
„Само поврзувањето со реалниот сектор, институциите и со компаниите е можност тоа што го научат додека студираат да не остане само на хартија, туку да се реализира и тие да бидат идни креатори на една успешна и здрава средина“, изјави проф. д-р Дејан Мираковски, ректор на УГД-Штип.
Од Стопанската комора посочуваат дека недостигот на квалификувана работна сила сѐ повеќе станува сериозен предизвик за пазарот.
„Недостигот на квалификувана работна сила сѐ повеќе ќе станува хроничен проблем, а спојувањето на практиката и науката уште од самиот почеток на профилирањето на кадрите и те како може да придонесе да имаме лесно вработливи и препознаени кадри на пазарот на труд“, изјави Татјана Штерјова-Душковска, од Стопанската комора.
Градоначалникот на Штип, Иван Јорданов, посочува дека недостигот на квалификуван кадар веќе се одразува во стопанството, особено кај инженерските профили.
„Трудоинтензивната дејност е дејноста која го намалува интензитетот на работа. Не само заради намалување на профитот, туку и заради сѐ помалиот број на работоспособна, односно заинтересирана работна сила во овој сектор“, изјави Иван Јорданов, градоначалник на Штип.
Отворениот кариерен ден на УГД, со поддршка на Општината и Стопанската комора, се одржува веќе втора година по ред.
