Никогаш неодговорен телефонски повик. Ова е епилогот по тешка сообраќајна несреќа со жртви. Токму тоа е пораката на новата кампања на Министерството за внатрешни работи и мобилниот оператор А1. Откако Македонија беше преплавена со билборди, над 20.000 граѓани свртеле на испишаниот број 078/274-283.
За тешките незгоди неретка причина е и користењето на мобилните телефони.
- „Беше специфично и морбидно она што го спроведовме, но тоа беше и целта. Она што за полицајците и докторите е секојдневие по сообраќајна незгода во Македонија, да биде момент кој ќе допре до секој граѓанин кој ќе се јави на овој број а нема да добие повратен одговор“ рече Тошковски.
Кампањата ќе продолжи и натаму, велат од А1, од каде посочија дека на телефонскиот број не вртеле само нивни корисници.
- „Преку оваа иницијатива сака да поттикне реална промена во однесувањето и поголема свесност за важноста на вниманието во сообраќајот“ рече главниот извршен директор на А1 Македонија, Методија Мирчев.
Наделжните велат дека „Сејф сити“ покажува конкретни резултати, и сега се е фокусирани на имплементација и во другите градови. Но во следниот период системот ќе се унапредува и ќе се зголеми бројот на прекршоците кои ќе се детектираат.
- „Во делот на погрешно паркирање, тоа ќе е една од првите фази кои ќе бидат имплементирани. Тука ќе бидат вклучени повеќе институции, бидејќи е многуброен прекршок, не сакаме, при нецелосно утврдени правила на игра, да имаме казнување на граѓаните. Затоа сме внимателни во овој дел. До тогаш ќе се санкционираат главните улици во Скопје“, изјави министерот.
Во периодот што следи најавени се засилени контроли и строги мерки против моторџиите кои дивеат низ градовите и не ги почитуваат сообраќајните правила.
- „Ова не се однесува на тие кои возат со кацига, со соодветна брзина… А најавувам за тие кои глумат дека се моторџии, односно возат мотор без кацига, со далеку поголема брзина, возат на црвена, го дигаат на едно тркало, и мислат дека ‘Сејф сити’ не ги детектира, МВР ќе биде фокусирано на нив, особено во градските средини. Слободно можам да кажам дека ќе ги изгориме! Ќе останат и без мотори и без можноста да глумат дека се моторџии“, изјави Тошковски.
МВР ја анализира законската регулатива за електрични тротинети, и се размислува за рестрикции и за управувањето од малолетници. Заострување на законите ќе има и за нив согласно европските практики.
