Министерството за здравство соопшти дека целата документација и извештаите од надзорот над Стоматолошката комора се предадени до Основното јавно обвинителство. Станува збор за три извештаи, датирани од февруари и мај 2025 година, кои укажуваат на законски неправилности во работата на Комората.
Покрај нив, доставени се и дополнителни документи и известувања од Секторот за стоматолошка здравствена заштита. Поради утврдените пропусти, Министерството привремено ја презеде надлежноста за издавање и продолжување на лиценците за стоматолозите. Докторите сега треба да ја поднесат документацијата директно во Министерството.
Министерот Азир Алиу изјави дека се утврдиле сериозни пропусти, како што се користење нерегистрирани здруженија за едукација и неправилни сертификати. Тој го оцени преземањето како почеток на реформи што ќе ја вратат довербата и ќе гарантираат квалитетна стоматолошка услуга. Воедно, посочи дека постојат индиции и за финансиски злоупотреби.
Од Стоматолошката комора реагираа дека при сите досегашни контроли не биле најдени неправилности и ги демантираа тврдењата дека незаконски работеле и не постапиле по насоките од Министерството.
