По речиси еден век постоење, ќе се реконструира училишната зграда во карбинското село Радање. Старите училници со испукани ѕидови ќе добијат нов лик, а целосно ќе се промени и кровот што прокиснува. Реконструкцијата на училиштето во кое учат околу седумдесеттина ученици.
„И самите бевте сведоци, ги видовте условите во кои овие дечиња досега учеле. Навистина ќе бидат знчајни овие интервенции коишто ќе се направат во овој објект и на овие седумдесеттина дечиња коишто го посетуваат ова училиште на дневна основа , ќе им овозможиме соодветни и модерни услови. Ова е само потврда дека оваа Влада, инвестира секаде и рамномерно. За нас не постојат заборавени места„ изјави министерот за локална самоуправа, Златко Перински.
Реконструкцијата на училиштето ќе чини 8,9 милиони денари. Половина од средствата преку програмата за диспаритети, ги обезбеди рерсорното министерство, додека останатите 50% се од буџетот на општина Карбинци.
„Учениците и наставниот кадар ќе добијат нови услови во модерно училиште кое ќе биде со енергетска фасада, со променет систем за загревање, нова водоводна и електрична инсталација, нов кров, ѕидови и под. Ова ќе биде целосно модерно училиште како што треба да изгледа во 21век„ изјави градоначалникот на Карбинци, Виктор Паунов.
Се очекува реконструкцијата на училишната зграда да заврши пред стартот на новата учебна година, но доколку градежните активности се пролонгират учениците со часови ќе продолжат во централното училиште во Карбинци, кое е оддалечено околу 4 километри.
