Продолжува падот на цените на производите и услугите. Гувернерот на Народната банка, Трајко Славески вели дека инфлацијата бележи надолен тренд, а во некои летни месеци имало и дефлација. Поради ниската споредбена основа од лани кога важеа мерки за стабилизација на цените, инфлацијата е се уште на ниво од околу 4%, но гувернерот очекува таа да се намалува до нивото меѓу 2,5 и 3% следната година.
Народната банка излезе и со одлуки кои ќе придонесат за побрз одговор на монетарната власт во борба против инфлацијата. Се менува структурата во тргувањето со благајничките записи. И покрај тоа што нема промени во референтната каматна стапка од 5,35%, се зголемува обемот на издавањето на благајнички записи со камата од 4%, преку кои Народната банка повлекува значителен дел од вишокот средства од деловните банки.
„Новата оперативна поставеност предвидува еден основен инструмент, благајнички записи со рочност од 7 дена, со каматна стапка околу која е поставен симетричен коридор на каматните стапки, за разлика од претходната поставеност кога како основен инструмент се користеа благајнички записи со рочност од 42/49 дена и беше применуван асиметричен коридор на каматните стапки. Скусувањето на рочноста на основниот инструмент на седум дена овозможува поефикасно пренесување на монетарните сигнали до краткорочните каматни стапки на пазарот на пари, врз коишто централната банка има подиректно влијание“ – вели Трајко Славески – гувернер на Народна Банка.
Статистика измери дека во ноември трошоците за живот на годишно ниво се зголемени за 4%. Од Народната банка велат дека се намалени притисоците од увозните цени. Економскиот раст во третиот квартал бил 3,8% на годишна основа, а податоците за индустриското производство и домашната побарувачка покажувале дека БДП ќе забележи повисок раст во последните три месеци од годината. Главните ризици доаѓаат однадвор и се главно резултат на геополитичките поместувања.
