Поттикнување општествени промени иницирани од лицата со попреченост, со цел создавање потранспарентно, поодговорно и поинклузивно управување на локално ниво, се целите на проектот што Здружението „Хендикеп плус” го реализираше во соработка со Општина Штип.
Претседателката на здружението, Бранкица Димитровска, информираше дека на завршниот настан биле презентирани резултатите од проектот, финансиран во рамки на Бугарска помош за развој. Во рамки на активностите, статутот на Општина Штип е издаден на Брајово писмо и адаптиран за лица со оштетен слух, а извршено било и мапирање на пристапноста и непристапноста на околу 40 јавни објекти во општината.
-Проектот природно произлезе како резултат на претходните два во Општина Крива Паланка – прва општина во државата што го адаптираше својот статут на Брајово писмо,а беше формиран и Совет за прашања на лицата со попреченост. Целта на овој проект е да се поттикнат општествени промени во општината иницирани од лицата со попреченост, со цел создавање потранспарентно, поодговорно и поинклузивно управување на локално ниво. Специфичните цели се насочени кон унапредување на спроведувањето на обврските од Конвенција за правата на лицата со попреченост преку активно учество на лицата со попреченост во креирањето и донесувањето одлуки на локално ниво- рече Димитровска.
Во Општина Штип, покрај статутот издаден на Брајово писмо и адаптиран за лица со оштетен слух, во рамките на проектот беше извршено и мапирање на пристапноста и непристапноста за лицата со попреченост на околу 40 јавни објекти во општината: паркинзи, автобуски превоз, надворешни патеки, лифтови, влезни врати, тоалети и пристапни рампи на институциите. Објектите веќе се означени со налепници „пристапно“ или „непристапно“.
Од Општина Штип посочиле дека локалната самоуправа континуирано соработува со здруженијата на лицата со попреченост, со цел утврдување на приоритетните проблеми и изнаоѓање соодветни решенија.
Проектот „Заедно за инклузивна општина“ на „Хендикеп Плус“ претставува дополнителен поттик за соработка меѓу здруженијата на лицата со попреченост и општинските власти.
На настанот бил присутен и амбасадорот на Бугарија во земјава, Желјазко Радуков, кој посочил дека ова е само еден од проектите што Амбасадата на Бугарија во Северна Македонија ги поддржува, бидејќи на лицата со попреченост треба да им се овозможи активно да придонесуваат во развојот на општеството.
На веб-страницата на Општина Штип веќе е достапна аудио-визуелна презентација на статутот на општината со превод на знаковен јазик.
