Синдикатот на вработените во државниот сектор во Грција утрово започна 24-часовен штрајк поради буџетот за следната година, што вечер се очекува да биде изгласан од грчкиот парламент. Од синдикатот сметаат дека новиот буџет е антиграѓански и носи дополнителни даночни оптоварувања за работниците и нови привилегии за големите бизнис-групации.
Во штрајкот, освен државните службеници, учествуваат и вработените во локалната самоуправа, како и наставниците и професорите од основните и средните училишта и здравствените работници од државните болници. Во грчкиот парламент во петокот започна петдневната расправа за државниот буџет за 2026 година, а гласањето, кое традиционално во Грција се смета како глас за доверба на актуелната влада, е закажано за вечер. Се очекува буџетот да го поддржат само пратениците од владејачката Нова демократија, кои имаат мнозинство во парламентот.
