Габриела Илиевска, претседателка на Советот на Општина Битола и претставничка на независната граѓанска иницијатива „Поинаку“, денеска објави дека како независна кандидатка ќе влезе во трката за градоначалничката функција во Битола.
„После сите шпекулации, написи, приказни, плукања, честитки – еве да расчистиме. Ве повикувам сите битолчани, без разлика дали сте симпатизери или членови на која било политичка партија, досегашни гласачи на која било опција или негласачи, сите кои сакате да живееме во поубава, почиста, непартиска, независна Битола – да ме поддржите како независен кандидат за градоначалник и да се приклучите кон фронт против 30 и кусур годишното запоставување на градот,“ изјави Илиевска.
Таа нагласи дека нема средства за скапи кампањи и маркетинг, но тоа нема да ја спречи во борбата за, како што рече, подобра и поинаква Битола.
