Фондот за здравствено осигурување ги засилува контролите во здравствените установи со кои има склучено договор. Ќе проверува дали на пациентите им се наплаќа за бесплатни услуги.
„Фондот потсетува дека за здравствените услуги што се обезбедуваат на негов товар, во здравствените установи со кои има склучено договор, осигурениците немаат обврска да плаќаат дополнителни износи, освен законски утврденото учество – партиципација, доколку за конкретната услуга е предвидено такво учество“, стои во соопштението на Фондот.
Здравствените установи имаат обврска на видно и достапно место да ги истакнат информациите за висината на партиципацијата, а за извршените плаќања да издаваат соодветен законски доказ за наплатата.
Доколку при контролите се утврдат неправилности, Фондот ќе преземе соодветни мерки во рамките на своите надлежности.
„Осигурениците кои располагаат со информации за евентуална неоснована наплата на здравствени услуги можат да се обратат до Секторот за контрола на Фондот, при што нивните пријави ќе бидат разгледани со почитување на приватноста и заштитата на личните податоци, согласно законот“, соопштија од Фондот.
