Лидерот на СДСМ, кој е во посета на Франција, посочи дека подготовката на резолуцијата со која ќе се одредат „црвените линии“ на земјава е во финална фаза. Според него, документот ќе овозможи вин-вин решение за државата и за граѓаните.
„Тука сум да го промовирам и бранам националниот интерес и позициите на Македонија, која мора да продолжи по европскиот пат активно, со резултати и со визија“, истакна Филипче.
„Со оваа резолуција ќе понудиме национален механизам за справување со евентуални непринципиелни барања од Бугарија во текот на преговорите, ако тие на било кој начин излегуваат од преговарачката рамка, а се однесуваат на македонскиот јазик, култура и идентитет – темелни вредности кои се веќе заштитени во повеќе европски документи и со самата рамка. Со носење на резолуција со национален консензус ќе ги потврдиме овие позиции, но и ќе изградиме заеднички став како да ги заштитиме и во домашните институции“, порача Филипче.
Тој ги изнесе овие ставови по средбите со француските претставници од Генералниот секретаријат за европски прашања, Француското министерство за Европа и надворешни работи и со членови на Парламентот на Франција.
