Црвениот килим е подготвен за филмската магија на „Утре наутро“ , премиерна проекција на најновото дело на Јани Бојаџи кое ќе блесне на големото платно во Синеплекс, поради големиот интерес филмот ќе се прикажува истовремено во три кино сали.
Станува збор за политичка драма полна со низвесност и интриги, инспиририна од случувања на и по 27 април 2017-та година, ден што засекогаш ја смени македонската современа историја. Судир меѓу идеалите и реалноста, границата помеѓу вистината, лагата и совеста.
Филмот е посветен на сите жени во Македонија кои се подготвени да ги одбранат своите семејства и заедница.
Една од главните улоги ја има Нина Деан, која во филмот влегува во чевлите на Јоана Пеласка, сопруга на поранешен премиер. Вели дека снимањето и било предизвик зашто силните женски улоги се ретки, особено во македонската кинематографија.
Нејзините деца, Тина и Борис, ги играат младите актери Јана Никодиновска и Гоце Андонов.
Дел од останатите улоги ги толкуваат Ирена Трајковска, Кети Дончевска Илиќ, Васил Зафирчев, Горан Стојаноски, Северџан Бајрам, Владо Јовановски, Александар Микиќ, Жаклина Стефковска, Благоја Чоревски…
На снимањето беа ангажирани и безмалку 1.500 статисти, а се снимаше на десетици локации во Скопје и неговата околина.
Филмот е дел од поголем проект кој вклучува и телевизиска серија во пет продолженија која треба да се емитува на ТВ Алфа наредната година.
„Утре наутро“ покрај во Скопје во Синеплекс, од утре ќе може да се погледне и во кината во Штип, Велес, Богданци, Струга и Крива Паланка.
