Две години затворска казна за Сулејман Љамалари, напаѓачот на градоначалничката на Скопје, Данела Арсовска. При соопштувањето на пресудата, судијката образложи дека обвинението е докажано надвор од секакво разумно сомневање. Таа нагласи дека делото е извршено врз функционер, за време на извршување на функцијата, што претставува директен атак врз државна институција. Дополнително, беше истакнато дека обвинетиот користел физичка надмоќ врз градоначалничката, со оглед на тоа што таа е жена.
Инцидентот се случи на 11 јули 2025 година, кога Арсовска била на терен во Чаир по пријава за бесправна градба. Според обвинението, Љамалари пристигнал со електричен тротинет и ја нападнал градоначалничката физички и вербално, нанесувајќи и телесни повреди и упатувајќи сериозни закани.
Во текот на судскиот процес, обвинетиот тврдеше дека не е напаѓач, туку жртва на настанот, и дека тој бил нападнат од Арсовска. Тој изјави дека само се обидувал да го тргне нејзиниот телефон за да спречи неовластено снимање и дека бил удрен со нога од страна на оштетената.
