Германски државјанин е осуден на условна казна од две години, но и протерување од Македонија со забрана за влез од пет години, заради веење на знамето на „Голема Албанија“ со натпис „Автохтона“, пред натпреварот меѓу фудбалските клубови Шкендија и Карабаг на 5 август.
Против него беше поднесена кривична пријава од страна на СВР Скопје, а Обвинителството отвори постапка по член 319 од Кривичниот законик – за предизвикување омраза, раздор или нетрпеливост врз национална, расна, верска или друга дискриминаторска основа.
Според надлежните, сторителот со своите дејствија поттикнал етничка омраза непосредно пред фудбалскиот натпревар, а бил идентификуван и лишен од слобода од страна на полицијата. МВР и Јавното обвинителство најавија дека ќе продолжат со засилени активности за санкционирање на секој обид за ширење омраза и нетрпеливост на спортски настани. Веднаш по идентификација на сторителите, тие ќе бидат процесуирани согласно законските процедури.
