Министерството за економија и труд активно работи на спроведување на реформската агенда и многу брзо ќе стигнеме во целосно исполнување на условите за добивање зелено светло од Европската унија, истакна денеска ресорниот министер Бесар Дурмиши одговарајќи на прашање на пратеничката Сања Лукаревска.
Според него, пазарниот и трудовиот инспекторат во 2025 година направиле рекорден број контроли, односно за 25 отсто повеќе во однос на претходниот период. Извештајот, нагласи, ќе биде доставен до Европската унија и во март 2026 година очекува позитивно усогласување.
– Разликата меѓу тоа колку сме посветени на реформската агенда за разлика од вас, тоа е како ден и ноќ. Сите работи кои вие не сте ги почнале или реализирале до половина ние ги завршуваме. Имаме наследено еден процес, кој требаше да биде почнат во 2019 година и да заврши до 2023 година. Но ние оваа работа ќе ја завршиме, рече Дурмиши.
Тој подвлече и дека Владата не е против зголемување на минималната плата, но смета дека тоа треба да биде одржливо, да има економски раст и да се земе предвид и производството.
-Економско – социјалниот совет ги поддржува и работниците и работодавачите и ако тие се договорат тоа ќе биде и во интерес на државата, додаде Дурмиши.
Со зголемување на минималната плата, нагласи, државата ќе има повеќе приходи, но го постави прашањето дали ќе може работодавачите да го поддржат пазарот и да се соочат со дополнителните трошоци.
– Минималната плата не е најмала во регионот, имаме соседни држави каде што е помала од нашата држава. Ќе работиме минималната плата да биде повисока и од државите во ЕУ. Не случајно работиме на зголемување на работите во индустријата, со поддршка на малите и средните компании во индустријата и да имаме нови работни места, продуктивност и зголемување на минималната плата. Имаме една формула, каде имаме договор меѓу работодавците и ќе го поддржиме тој став во март 2026 година, рече Дурмиши.
Нагласи дека според информациите на Еуростад, ние имаме најефтина потрошувачка кошница во цела Европа.
