Бизнис центарот „Соравиа“ во срцето на Скопје е ставен под извршителска продажба поради неплатени финансиски обврски. Дрин Ахмети, кој беше сопственик на објектот, не успеа да го задржи имотот.
„Соравиа“ стана тема на јавни расправи поради контроверзниот процес на промена на сопственичката структура на компанијата која ја поседува оваа атрактивна некретнина – „Соравиа Инвест“. Во моментов, имотот е ставен на продажба од страна на извршител, по барање на доверител за извршување на долг кој надминува 930.000 евра.
Според јавно објавениот заклучок на веб-страницата на Комората на извршители, почетната цена за бизнис центарот изнесува 1.377.978.526 денари, односно околу 22,4 милиони евра. Извршителот ја наведува бугарската „Прва инвестициска банка“ како доверител, од која се бара извршување поради долг од околу 930.000 евра.
Огласот за продажба беше објавен на 24 март, а лицитацијата е закажана за 24 април во канцеларијата на извршителот Андреја Буневски. Процесот на извршување вклучува уште тројца извршители. Во објавениот заклучок за лицитацијата се наведени сите катастарски податоци за недвижностите во состав на центарот „Соравиа“.
Ова не е единствениот долг на „Соравиа Инвест“ кон истата банка. Во 2020 година, компанијата доби кредит од „Прва инвестициска банка“ и има и други нерешени побарувања од различни доверители.
