До крајот на 2027-ма година треба да профункционира заедничкиот железнички граничен премин Табановце со Србија. Денеска се докомплетираше финансиската рамка, со потпишување грант во висина од 2,4 милиони евра меѓу Владата и Европската банка за обнова и развој. Со овој проект, значително ќе се подобри комуникацијата со соседна Србија, но и со државите од Срдна Европа. Треба да се подобри транспортот на стоки и превозот на луѓе. Вицепремиерот Николоски вели дека на овој начин ќе се отворат можности за отворање нови работни места и забрзување на економскиот раст. Освен во патничкиот сообраќај, ќе има и ONE STOP SHOP во железничкиот дел.
За претставниците од ЕБОР и ЕУ, клучна за реализацијата на овој проект била политичката волја од двете држави, Србија и Македонија. Вистински предвизвик било да се координираат активностите на толку голем број на институции. Проектот предвидува изградба на нова заедничка зграда за потребите на Граничната полиција, Царина и инспекциски служби на Македонија и Србија, како и реновирање на постојните објекти во Табановце. Исто така предвидена е изградба и на нова патна и комунална инфраструктура.
Кон средината на годинава треба да биде избран изведувач на градежните работи, компанија која има рок од две години да го заврши проектот. Финансиската рамка „тежи“ 7,6 милиони евра. Освен грантот од 2,4 милиони евра, претходно ЕБОР за овој проект одобри заем од 5 милиони евра, како и грант средства за техничка поддршка и консултантски услуги од 250 илјади евра.
