Вторник, 20 часот и 45 минути. Избил пожар на 7-миот кат во Домот за пензионери во Тузла каде што биле сместени неподвижни луѓе. Огнот брзо почнал да се шири кон погорните спратови. Евакуацијата на старите и изнемоштени одела отежнато. Загинале 11 луѓе, а над 30 се хоспитализирани.
„Мора навистина да се заблагодарам на противпожарната единица Тузла, на пожарникарите од околните општини и градови. Штом се вклучи алармот кај нас, кога нашиот работник се јави, тие пристигнаа за 5 минути. Посебна благодарност до Полициската управа Тузла, специјалците, полицајците — сите дојдоа без кислород, без маски влегуваа внатре. Итната помош даде сè од себе.“– изјави директорот на домот за пензионери во Тузла, Мирсад Бакаловиќ.
Директорот на Домот поднесе оставка од морални причини.
Меѓу повредените се и медицински лица, тројца полицајци и петмина пожарникари како и дел од персоналот во домот.
„Очекуваме одреден редовен прилив на пациенти, немаме ништо најавено, но може да се очекува со оглед на тоа што станува збор за повозрасни лица, а можно е и пренасочување на пациенти кон други локациите во Тузла.“– изјави директорот на Универзитетскиот клинички центар во Тузла, Шекиб Умиханич.
Тамошното обвинителство потврди дека истрагата е во тек за да се утврдат причините за пожарот и евентуалните пропусти во безбедносните процедури.
Очевидци велат дека наскоро по избувнувањето на пожарот се видел голем густ чад и во објектот завладела паника.
„Јас бев легната, кога почна нешто — пука, пука, пука. Не знаев дали прозорците останаа цели или се испукаа, јас сум на трети кат. И почна нешто да се руши таму, ама јас веднаш ја повикав рецепцијата, не можев да добијам. Потоа погледнав низ прозорецот — одозгора паѓаа сите оние големи парчиња, ронки од ѕидови. Тогаш излегов во ходникот, и некој ми се јави и ме праша: „Каде сте? Дали сте загрозени?“ Јас реков: „Не, не сум загрозена.“– изјавија очевидци.
Босна и Херцеговина тагува за загубата на своите граѓани, а земјите од регионот изразија сочувство до семејствата на жртвите.
