Зголемена наплата на царински давачки, заплени на нелегални стоки, модернизација на гранични премини, дигитализација на услугите. Директорот на Царина даде отчет за сработеното во првите 100 дена од мандатот. Приходите на Управата биле поголеми за 9,2% односно биле наплатени дополнителни 48 милиони евра за ДДВ при увоз, акцизи, давачки за моторни возила и други. Бројот на случаи на заплени во овој период е зголемен за 60,2 проценти, а бројот на пријави за сторени кривични дела поднесени од страна на Царинската управа е зголемен за речиси три пати.
Јули бил дефинитивно најуспешен месец кога бил постигнат рекорд во наплатата на царинските давачки, односно 12 милијарди денари. Приходите од увозните давачки во јули забележале раст од 23,7%, во август 8,9% и во септември 24,5%. Приходите од акцизите пак биле поголеми за 16,6% во јули, 12% во август и 26% во септември. Министерката за финансии вели дека е задоволна од улогата на Царината во спречувањето на нелегалната трговија.
Царинскта Управа интензивно работи на модернизација на граничните премини Деве Баир и Ќафасан, дигитализација на постапките, како и на новиот интегриран систем за видео надзор и систем за автоматско препознавање на регистарски таблички. Инаку, учеството на наплатените приходи од страна на Царинска управа во вкупните приходите на Буџетот изнесува 41%. Приходите на царината изнесуваат дури 73% од вкупните даночни приходи.
