Денеска се навршуваат девет години од катастрофалните поплави во Стајковци и Сингелиќ, кои зедоа 22 животи. Голем дел загинаа на скопската обиколница, а некои од нив останаа заробени во домовите од надојдената вода и се удавија неможејќи да излезат. Најмладата жртва меѓу загинатите е двегодишно дете.
Во незапаметеното невреме и катастрофалната поплава беа евакуирани илјадници луѓе во текот на 24 часа, на 6 август 2016 година во Скопје. Граѓаните од целата држава, координирани од Црвениот крст, Kризниот штаб и надлежните институции, се солидаризираа за собирање на најнеопходната помош за настраданите.
Градоначалникот на Гази Баба, Бобан Стефковски, соопшти дека наредната година ќе се изгради спомен-плоча за жртвите од катастрофалните поплави.
„Поминаа девет години, но раните од тие моменти сѐ уште болат. Затоа, како градоначалник на општина Гази Баба, верувам дека имаме морална обврска да ги чуваме спомените живи и да оставиме траен белег на колективното паметење“, напиша Стефковски.
