Ќе успеат ли новите санкции на Доналд Трамп да го променат ставот на Владимир Путин и да донесат крај на војната на истокот на Европа?
Неколку дена откако Вашингтон воведе санкции за две од најголемите руски нафтени компании – „Росњефт“ и „Лукоил“, специјалниот претставник на Владимир Путин за инвестиции и економска соработка, Кирил Дмитриев, итно е испратен на преговори со американските колеги.
Тој не очекува мерките да имаат голем ефект врз руската економија, но се надева дека САД, Украина и Русија конечно ќе дојдат до дипломатско решение за крај на војната.
Американскиот претседател Доналд Трамп, пак, очекува конечно и Пекинг да се вклучи во мировните преговори и да застане на страната на САД.
Во меѓувреме, од Европа стигнува најава за испраќање нови ракети, воена опрема и дополнителни санкции за Русија. Британскиот премиер ги повика европските лидери да се согласат замрзнатите руски средства да се искористат за зајакнување на одбраната на Украина.
Од Елисејската палата, пак, повикаа на засилување на воената поддршка за Украина.
Во меѓувреме, Русија продолжува со нападите врз Украина. Цел на балистичките ракети повторно беше престолнината Киев, каде што неколку лица се повредени. Сирените за воздушен напад во Киев беа активирани во три часот по полноќ, а кратко потоа закана од воздушни напади беше прогласена низ цела Украина.
