Црна Гора сепак ќе затвори пет поглавја од преговорите за членство во Европската Унија, откако Франција се премисли околу блокадата на две од предвидените точки. Пресвртот уследи по разговорот на црногорскиот премиер Милојко Спајиќ со францускиот претседател Емануел Макрон.
Спајиќ остварил средби и со германскиот канцелар Фридрих Мерц, со голем број министри за надворешни работи на земјите членки на Европската Унија, со тројца европски комесари, како и со претставници на администрацијата на ЕУ. Овие разговори, како што се наведува, придонеле за надминување на дел од пречките во преговарачкиот процес.
Меѓувладината конференција, на која формално ќе се потврди затворањето на поглавјата, според претходните најави ќе се одржи во вторник.
Црна Гора ќе ги затвори следните поглавја:
– Поглавје 3 – Право на основање претпријатија и слобода на давање услуги
– Поглавје 4 – Слободно движење на капитал
– Поглавје 6 – Право на трговските друштва
– Поглавје 11 – Земјоделство и рурален развој
– Поглавје 13 – Рибарство
Со затворањето на овие пет поглавја, Црна Гора ќе влезе во следната, веројатно и клучна година од преговорите со вкупно 12 затворени поглавја. Целта останува до 2026 година да бидат затворени повеќе од 20 поглавја, со што би се создале услови земјата да пристапи кон Европската Унија до крајот на 2028 година.
