Бугарија го злоупотребува Европскиот парламент и продолжува да го негира македонскиот идентитет, поради внатрешни националистички интереси – реагира „Европската слободна алијанса“, партија која ги застапува малцинствата во Европскиот парламент. Оваа реакција доаѓа во пресрет на дебатата во Комисијата за надворешни работи при Европскиот парламент за извештајот за Македонија, која еднаш веќе беше одложена.
Бугарските европратеници, преку амандмани, се обидуваат да интеревенираат во делот каде што е признат македонскиот идентитет – со зборот „сегашен“, продолжувајќи ја реториката на непризнавање на посебноста на нашиот идентитет.
Од ЕФА велат дека сакаат да ја подигнат свеста за овие практики. – „Европскиот проект никогаш не треба да биде загрозен на сметка на националистички цели на земјите-членки. Ние им веруваме на законодавците на ЕУ, кои се одговорни за развојот на извештаите, и сакаме да ѝ дадеме вредност на нивната работа, која треба да биде ослободена од притисок и уцена.
Бугарската држава одбива да го признае македонскиот идентитет и, без отстапки од Македонија, Бугарија ќе продолжи да ги попречува нејзините европски амбиции“, се вели во реакцијата на Европската слободна алијанса. Од партијата предупредуваат и дека македонското малцинство во Бугарија се соочува со државно и полициско малтретирање и дискриминација.
