Следната година ќе биде пресудна за градежништвото. Откако вчера Предлог-буџетот беше усвоен во Владата, градежниците конечно очекуваат некакво придвижување на овој сектор. Велат долгогодишната замреност и значително намалените капацитети речиси ги уништиле компаниите, па затоа имаат големи надежи во реализацијата на капиталните инвестиции во висина од 823 милиони евра во 2025-та година. Очекуваат градежна офанзива, за овој сектор повторно да стане двигател на економијата. Сметаат на 250-те милиони евра кои ќе ги добијат општините за инфраструктура, но и на бројни проекти за кои поради изборите не беа распишани јавни набавки.
Големи надежи градежниците имаат и во реализација на четирите делници кои ги гради американско-турскиот конзорциум Бехтел и Енка. Сепак, бараат домашните компании да работат под истите услови како и странските.
За дел од аналитичарите, буџетот е креиран оптимистички. Сепак, велат дека има простор да се соберат повеќе пари во државната каса преку намалување на сивата економија. Борбата со корупцијата ќе биде пресудна за да се соберат повеќе пари во буџетот.
250 милиони евра треба да завршат како поволни крдити кај стопанството. Дел од аналитичарите велат дека овие пари не треба да бидат залудно потрошени, туку треба да се таргетираат фирми кои ќе донесат поголема додадена вредност во економијата.
Буџетот за следната година предвидува повисоки пензии за 2500 денари месечно, поголеми суми за плати во здравството и образованието, како и повеќе пари за редовно усогласување на платите во администрацијата. Расходите ќе бидат за 10% поголеми од годинава или 6,5 милијарди евра. Приходите пак ќе бидат зголемени за 13% и ќе достигнат 5,82 милијарди евра. Дефицитот се стабилизира на ниво од 4% од БДП или на 682 милиони евра.
