Триесет млади луѓе, кои беа повредени во дискотеката Пулс, се на рехабилитација во Општа болница во Кочани. Дел од нив се со изгореници, ампутирани делови од телото, нагмечувања. Дополнително на уште педесетина од повредените им се прават редовни преврски. Во штипската Клиничка болница, на Одделот за физикална терапија, со помош на специјалисти физијатри се рехабилитираат тројца. Има најава дека од понеделник, бројот на пациенти ќе се зголеми. Во меѓувреме специјалисти и медицински сестри од штипската и кочанска болница ја завршија шестнеделната обуката организирана од страна на англиската Организација за ургентна медицина, сертифициран тим од доктори специјализирани за тренинг рехабилитација на пациенти со изгореници
„Нашиот тим се состоеше од клучни експерти за рехабилитација коишто потекнуваат од Гана, Египет, Бразил и од Мексико, како дел од тимот на англиската Организација за ургентна медицина, со цел да се овозможи рехабилитација на пациентите со изгореници. Тимот којшто е единстен и сертифициран на светско ниво за да обезбеди тренинг и рехабилитација токму кај вакви пациенти„ изјави д-р Хуан, од англиската Организација за ургентна медицина.
По обуките здравствените работници ќе бидат обучени соодветно да ги практикуваат протоколите за лекување од изгореници. Со ова се овозможува повредените да не патуваат до болниците во Скопје, туку целата здравствена нега ја добиваат во штипската и кочанска болница.
„Во обуката присуствуваа доктори од КБ-Штип и општа болница, Кочани, физијотерапевти, медицински сесстри, хирурзи и инструментарки. Обуката беше интензивна и сакам искрено да се заблагодарам на докторот и неговиот тим за несебичното помагање во стекнување на знаење, искуство и вештини во областа на рехабилитација на изгорениците„ изјави-д-р Никола Костадинов, специјалист фезијатар во КБ-Штип.
Во пожарот во дискотеката Пулс беа повредени околу 200млади луѓе. Голем дел од нив, поради сериозноста на повредите беа испратени на лекување во странство, а по враќањето во државата продолжуваат со рехабилитација во македонските болници.
