Огромни долгови во енергетскиот сектор наследило новото министерство за енергетика. Министерката Сања Божиновска вели дека во првите 100 дена од новата Влада се броеле долговите направени од претходната власт. Меѓу нив се огромниот долг од 60 милиони евра кон ЕВН за субвенционирана струја направен во последниве три години, изгубениот спор со ОКТА во вредност од 24 милиони евра, минус од 80 милиони евра во државните електрани се само дел од нив. За сите овие долгови да се вратат, ќе мора да се земат кредити – најавува министерката.
И покрај бројните предизвици со кои се соочува новото министерство, Божиновска уверува дека ќе вложи максимум за граѓаните и стопанството да имаат мирна зима на енергетски план и непрекинато парно греење во главниот град. Министерката вели дека за оваа зима, струја ќе се набавува однапред за да се обезбедат пониски цени. Божиновска ветува дека Владата ќе направи се, за од Нова Година да нема зголемување на цената на струјата за населението.
Божиновска уверува дека нејзина главна цел е консолидација на енергетскиот сектор, од земја увозник да станеме земја која може самата да ги покрие потребите за струја. Ќе се инвестира во електропреносната мрежа, когенеративни електрани на гас, ветерни и соларни електрани, модернизација на РЕК Битола, завршување на гасификацијата.
