Амар Мециновиќ, актуелен пратеник и поранешен член на Советот на Град Скопје, ќе биде кандидат за градоначалник на главниот град од партијата Левица.
Приоритети во неговата програма ќе бидат јавниот превоз, јавната чистота, борбата против загадувањето и носењето нов Генерален урбанистички план. „Левица сака да ги обедини сите кои се против ВМРО-ДПМНЕ и СДСМ“, рече Мециновиќ.
Претседателот на Левица, Димитар Апасиев, најави рекордно учество на партијата на овие локални избори – со над 20 кандидати за градоначалници и советнички листи во 62 општини.
Кандидати за градоначалник на Скопје се и Орце Ѓорѓиевски од ВМРО-ДПМНЕ и Каја Шукова од СДСМ. Првиот круг на локалните избори ќе се одржи на 19 октомври, а вториот на 2 ноември.
