Министерот за здравство, Азир Алиу во рамки на работната посета на Република Турција, ја посети градската болница „Анкара Билкент“, каде беа згрижени шест лица од повредените во Кочани, информира Министерството за здравство.
Во рамки на посетата, министерот се сретнал со д-р Али Емре Акгун и д-р Мерве Акин, кои го запознале со целиот тек на лекувањето, од приемот до завршување на нивното лекување.
-Со Република Турција имаме воспоставено одлична соработка во сферата на здравството и токму тие беа меѓу првите кои ни понудија помош за хоспитализирање на повредените лица од пожарот во Кочани. Токму овде во градската болница Анкара Билкент беа хоспитализирани шест пациенти, за кои беше обезбеден врвен третман од страна на медицинските тимови според европски стандарди. Со раководството на болницата ги разгледавме можностите за продлабочување на соработката и натамошна размена на искуства, истакнал министерот за здравство Алиу при посетата.
Министерот Алиу изразил особена благодарност до раководството и медицинските тимови од болницата за исклучителната посветеност во грижата и третманот на повредените лица од Кочани.
