Градоначалникот на Општина Бутел Дарко Костовски, во Приштина учествуваше на завршната церемонија за доделување на грантови за општините преку ИПА III програмата за прекугранична соработка помеѓу Косово и Македонија.
Како што соопшти Општина Бутел, проектот „Заеднички напори за намалување на отпадот и подобрување на одржливоста – REDUCE“ е финансиран од Европската Унија преку ИПА III програмата за прекугранична соработка помеѓу Косово и Македонија 2021-2027.
Проектот „REDUCE“ има за цел да придонесе кон почиста и поодржлива животна средина преку подобрување на системите за собирање, селекција и рециклирање на отпад. Активностите во најголема мера се насочени кон надминување на заедничките предизвици со кои се соочуваат и двете општини во Косово и Македонија, наведуваат од Општината.
Оттаму додаваат дека проектот ќе помогне општината да ги унапреди своите практики, согласно европските стандарди за заштита на животната средина. Добивката од проектот “REDUCE” е почиста и поздрава животна средина, современо управување со отпад и поголема еколошка свест кај граѓаните. Со помош и поддршка од Европската Унија се создаваат конкретни и долгорочни решенија кои во голема мера ќе го подобрат квалитетот на живот на граѓаните во двете општини.
