Сертифицирани НАТО оценувачи од денеска ја следат борбената способност на лесната пешадиска баталјонска група. Тим од четириесетмина почна со оценување на борбената готовност на единицата.
Проверката и оценувањето ќе се реализираат во рамки на престојната вежба „Блесок 26“.
„Во планирачкиот процес на оценување на борбената баталјонска група беше во корелација со раководството на вежбата „Блесок 26“, која ќе биде искористена за проверка и оценување на сите потребни критериуми за сертифицирање на баталјонската борбена група“, изјави потполковник Горан Кимов, директор на тимот за оценување.
Според потполковник Кимов, сценариото на вежбите е внимателно подготвено и структурирано во седум области. Неговата цел е да ги тестира сите аспекти на подготвеноста на баталјонската борбена група.
„Подготвени се повеќе од дваесеттина настани, проследени со преку 100 инциденти коишто ќе предизвикаат персоналот на баталјонската борбена група да ја покаже својата подготвеност“, изјави потполковник Горан Кимов, директор на тимот за оценување.
Конечните резултати од покажаното ќе бидат познати во петок, додека оценувањето ќе се одвива под постојан надзор на НАТО тим. Лесната пешадиска баталјонска група за оваа евалуација се подготвуваше четири години.
