Жителите на село Блатец повторно побараа раскинување на концесијата за мини хидроцентрала на реката Блатешница. Рокот што Владата го продолжи на 3 октомври минатата година завршува денеска, а градба сѐ уште нема. Преку Месната заедница, жителите поднесоа барање до Владата и до министерствата за животна средина и енергетика. Тие бараат раскинување на концесијата и заштита на реката, наведувајќи три причини за тоа.
„Концесионерот воопшто не започнал со исполнување на обврските за заштита на животната средина, односно не е направена проценка на влијанието на проектот врз животната средина. Втора причина е што концесионерот сторил повреда на Уставот, односно на правото на здрава животна средина, а трета причина е тоа што одобрението за градење на хидроцентралата е престанато“, изјави Блаже Анакиевски, претседател на МЗ на село Блатец.
Освен по правен пат, жителите на Блатец борбата за заштита на реката Блатешница ја продолжуваат и на терен. Откако истече дозволата за градба што локалната самоуправа му ја има издадено на концесионерот, тие велат дека ќе ја следат состојбата и нема да дозволат започнување на градежни активности. Дежурствата на местото каде треба да се гради хидроцентралата се сведени на минимум, но жителите најавуваат дека ќе реагираат доколку се појави механизација на терен.
„Блокадата како блокада сѐ уште си е легално пријавена во МВР, но дежурствата ќе бидат сведени на минимум за да не ни избега состојбата од контрола“, изјави претседателот на МЗ на Блатец, Блаже Анакиев.
Жителите на Блатец се сплотени и речиси цел месец со рампа и жив штит го чуваа местото на планираната хидроцентрала. При крајот на февруари организираа и двочасовна блокада на регионалниот пат Виница–Берово, предупредувајќи дека проектот може да предизвика еколошка катастрофа.
