Анѓел Симоновски води тешка, но храбра борба со аутизмот и пречки во развојот, дијагноза што целосно го промени животот на неговото семејство. Неговата мајка Марија сведочи дека Анѓел до третата година се развивал одлично.
– Кога беше мал, се развиваше прекрасно. На две – две и пол години зборуваше „мама, тато, баба, дедо“, броеше до 10 на македонски и англиски, ја знаеше азбуката… Редеше сложувалки и пееше песнички. И тогаш, на три и пол години – сè запре. Одеднаш. Тишина. Ниту збор повеќе, раскажува Марија.
Набрзо почнало да се менува и неговото однесување – често плачел, избегнувал контакт со очи и гледал на страна. По низа прегледи, пристигнала и дијагнозата: Ф-84 – аутизам.
„За лекувањето се потребни 15.000 евра, од коишто досега се собрани само половина, а терапиите треба да почнат веќе следната недела“, соопшти семејството.
Сите хумани граѓани кои сакаат да помогнат, можат да донираат на следната сметка:
Донациска трансакциска сметка – НЛБ Банка; Примач: Анѓел Симоновски; Број на сметка: 210-700000696111.
„Анѓел не се откажува. За него сега постои нова надеж – специјализирани третмани во Турција, коишто може значително да ја подобрат неговата состојба. Но трошоците за лекувањето се огромни и семејството не може да си ги дозволи, па без помош не може да продолжи понатаму. Секој придонес е чекор поблиску до подобро утре за Анѓел“, се додава.
Со цел да се соберат потребните средства, Ѓоко Јовиќ и „Енерџи бенд“, заедно со свои пријатели, организираат добротворна забава со наслов „Сите за Анѓел“, која ќе се одржи во понеделник, 26 јануари, со почеток во 19:30 часот, во ресторанот „Котура“ во Илинден – Скопје. Сите собрани средства ќе бидат наменети за лекувањето на Анѓел во Турција.
