Парите од унгарскиот кредит успешно се искористуваат од страна на бизнисот. Компаниите досега искористиле 225 милиони од вкупно достапните 250 милиони евра, односно толку пари се веќе префрлени од Развојната банка кон деловните банки преку кои се пласираат овие пари. Премиерот Мицкоски вели дека заемот целосно ќе се искористи во првите три месеци од годинава.
Владата го договори кредитот со Унгарија под мошне поволни услови. Компаниите добија заеми со каматна стапка од 1,95% и со грејс период од 3 години и 12 години рок на отплата. Ова, според Мицкоски треба да значи силен инвестициски циклус во земјава од најмалку 300 милиони евра. Премиерот вели дека Македонија е водечка во регионот на инвестициската мапа.
„Очекувам набргу, во првиот квартал од оваа година, целосно да биде исцрпен. И заедно со средствата кои што банките сопствени ги инвестираат во развојните проекти на компаниите, го поддржуваат стопанството и економијата и на тој начин Македонија на инвестициската мапа е навистина водечка во регионот. Ако се има предвид дека растот во првата половина од 2025 година, па би рекол и целосно во текот на целата 2025 година, е двоцифрен број проценти. Споредно со истиот период во рамките, да речеме, на еврозоната, тоа е 2-2,5%. Така што, јас сум навистина задоволен од начинот на кој што овие средства се искористени“, објасни Мицкоски.
Последната нова транша од унгарскиот кредит беше префрлена во првата недела од годинава во износ од 6,9 милиони евра. Тоа значи дека преостануваат да се пласираат уште 25 милиони до крајот на март. Кредитите се дел од заемот од една милијарда евра од Унгарија. Со половина милијарда евра се исплатија стари долгови, 250 милиони евра де наменети за компаниите, а 250 милиони за инфраструктурни проекти за општините.
