Сметките за струја поскапуваат од 57 денари месечно за оние кои најмалку ја користат до 900 денари за најголемите трошаџии. Регулаторната комисија за енергетика ја корегираше одлуката од ЕВН Хоум и наместо бараните 7,66%, им одобри во просек зголемување на цената за 2,28%. Во оваа група влегуваат 64% од вкупниот број домаќинства, или над 517 илјади потрошувачи. Пораст има и кај евтината тарифа, но наместо бараните 3,96% биле одобрени 2,5%. Во првиот блок, зголемувањето изнесува 2,45%, во вториот 2,87%, во третиот плус 3,32%, а во 4-тиот 3,84%.
Од Регулаторната комисија за енергетика им препорачуваат на малите потрошувачи да размислат за премин на слободниот пазар, бидејќи струјата во моментов е поевтина за околу 30% во однос на цената на универзалниот снабдувач ЕВН Хоум.
Крајниот пораст на сметките за струја е резултат и на намалувањето на трошоците за мрежарина за 4,96 отсто. Во однос на месечниот надоместок од 200 денари кој што се пресметува на сметките на струја, Бислимоски рече дека тој е неопходен, бидејќи доколку се укине, тогаш ќе предизвика значително зголемување на цената за блоковите. Доколку ЕВН Хоум не е задоволна од одлуките на регулаторната комисија има право на жалба. Од РКЕ објаснуваат дека формирањето на тарифните блокови на потрошувачи ги „спасило“ граѓаните од поголемо поскапување на струјата. Дополнително, сметаат дека цената на струјата е стабилна, со оглед на состојбите на берзите поради геополитичките случувања. Новата цена ќе важи за цела наредна година.
