Турската агенција за соработка и координација (ТИКА) вечерва во Скопје организира свечен прием по повод 21 декември – Ден на настава на турски јазик и 20. годишнина од отворањето на Канцеларијата на ТИКА во Скопје.
Централна церемонија по повод 21 декември Ден на настава на турски јазик ќе се одржи вечерва во СЦ „Борис Трајковски“ со обраќање на претседателот на ТИКА, Абдуллах Ерен и концерт на турскиот пејач Кирач.
Претходно во хотел „Александар Палас“ ќе се одржи свечен прием по повод Денот на настава на турски јазик и 20. годишнина од отворањето на Канцеларијата на ТИКА во Скопје.
Вчера беа одржани церемонии за предавање на два проекти реализирани од Турската агенција за соработка и координација (ТИКА) – Отворање на целосно реновираниот и опремен со средства обезбедени преку ТИКА на Здравствен дом Пласница и свечено отворање на лабораториите и церемонија за донација на возила на Јавната установа Хидробиолошки институт на Македонија во Охрид.
Претседателката Гордана Сиљановска-Давкова, која присуствуваше на свечената церемонија во Охрид, во обраќањето пред присутните изрази задоволство што само три месеци кога на одбележувањето на 90-годишнината од основањето на Хидробиолошкиот била најавена донацијата, денес веќе ја има својата реализација.
Станува збор за донација во опрема, за која беше истакнато дека не е насочена само кон зајакнување на капацитетите на Институтот, туку претставува инвестиција во науката, во заштитата на природното наследство и во иднината на водните еко-системи.
Со поддршка на турскиот народ целосно се реновирани и опремени одделенијата за фито за зоопланктон на Институтот, современ микроскоп со микроскопска камера за потребите на двете одделенија, како и ново теренско возило.
Директорот на ТИКА, Абдула Ерен, рече дека Агенцијата веќе дваесет години реализира бројни проекти во многу области во Македонија.
– Досега се реализирани над 1300 проекти во повеќе области. Главна цел на тие проекти е зацврстување на постоечките односи меѓу Македонија и Република Турција, рече тој.
Амбасадорот на Република Турција во земјава, Фатих Улусој, порача дека Турција секогаш била на страната на нашиот пријател и сојузник – Македонија, со која, како што рече, „споделуваме заеднички историски, културни и човечки врски уште од нејзината независност“.
ТИКА, како турска државна агенција, повеќе од две децении е активна во Македонија, реализирајќи бројни проекти за подобрување на инфраструктурата, здравството и образованието.
