Голем интерес кај населението за инвестирање во граѓански обврзници. Заврши рокот до кој можат да се запишуваат граѓански обврзници кај деловните банки. Во изминативе 15 дена сите заинтересирани можеа да се пријават во банкарските филијали за да учествуваат на аукција. Таа е закажана за утре и ќе трае од 9 до 14 часот, по што ќе се знае колкав износ е собран од населението. Минималниот износ кој може да се инвестира е 10 илјади денари. На аукцијата ќе бидат понудени двегодишни обврзници без девизна клаузула. Приносот од каматата изнесува 4,5% годишно.
„Проспектот е објавен на износ од 100 милиони денари. Понудите се доставуваат во деловните банки во земјава, а аукцијата ќе се одржи на 12 декември. Датумот на достасување на обврзниците од оваа емисија е 19 декември 2027 година, а исплатата на каматата за првата година ќе се изврши на 19 декември 2026 година, а за втората на 19 декември 2027 година“– велат од Министерството за финансии.
Министерката за финансии Гордана Димитриеска Кочоска вели дека има голем интерес кај населението за вложување во граѓански обврзници. Таа рече дека зависно од понудената сума, ќе се запише поголем износ од овие државни хартии од вредност.
Ова е трета граѓанска обврзница. Министерството за финансии досега имаше 2 емисии на граѓански обврзници во вкупен износ од 41,1 милион евра. Првата беше издадена летото 2023 година со рок на достасување од 2 години и каматна стапка од 5% годишно. Втората граѓанска обврзница беше издадена на 7 ноември 2023 година во износ од 17,6 милиони евра. Се работи за релативно нов финансиски инструмент со кој министерството за финансии се задолжува на домашниот пазар кај населението.
