Љупчо Коцевски неовластено оддавал службени тајни, информации поврзани со предмети во Јавното обвинителство, го нарушил неговиот личен углед и угледот на Обвинителството, работата и функционирањето на органите на прогон била ставена под знак прашалник. Не постапувал и чувал предмети во фиока и го нарушил интегритетот. Ова се причините поради кои Владата ja продолжува процедурата за разрешување на Коцевски од позицијата Републички обвинител, која беше привремено стопирана поради локалните избори.
Поради направени крупни професионални грешки при раководење со ЈО, нарушување на угледот, неовластено изнесување информации и податоци за судски предмети, како и непостапување по предмети, ја наруши функционалноста на Јавното обвинителство. Сериозно е нарушен интегритетот. Постапувајќи на овој начин, Коцевски флагрантно ја повреди должноста да го чува угледот на функцијата. Владата предлага на Собранието да го разреши Коцевски. Ако сакаме правна држава, состојбите мора да се сменат, бидејќи има само 2% доверба во судството, изјави портпаролката на Владата, Марија Митева.
Коцевски и натаму не отстапува. Смета дека предлогот за неговото разрешување бил политички мотивиран.
Овие ставови, Коцевски ги изнесе пред денешната седница на Советот на јавни обвинители каде се бираше претседател на ова тело. Откако мандатот на Душица Димитриевска истече на 1 октомври постапката за избор беше стопирана поради изборите. Башким Бесими кој до сега беше заменик претседател, официјално застана на чело на Советот за јавни обвинители.
